حكومة تعبد الورق!

بعد ما قعدت في السعودية أكثر من عشر سنين اشتغلت فيهم كمحاضر ومصمم جرافيك في إحدى الكليات التقنية، رجعت أعيش في بلدنا، أمنا الحنونة مصر بس نفسي أفهم هي ليه بتعمل في أولادها كدة رغم اننا بنحبها والله؟

رحت أستلم شغلي كمدرس في إدارة السلام التعليمية، دوخوني السبع دوخات بين سداد التأمينات والمعاشات والتوزيع على مدرسة وتوزيع أوراق "القيام بالعمل" على أقسام الإدارة ...... إلخ.

رحت الوزارة أعرفهم إن معايا ماجستير في الجودة وإن الجزء العملي من الرسالة كان تحويل المقررات الورقية إلى وسائط متعددة، أعطوني ورقة مهدئة وقالوا لي كل ما تيجي لك نوبة زي دي وتحس انك عاوز تفيد البلد ابقى اتصل على الرقم اللي في الورقة واحنا هنديلك جرعة مهدئة.

قلت حالياً ماليش عيش في القاهرة وطبيعي أرجع بلدنا في المنوفية؛ قدمت طلب انتداب للإدارة التعليمية وبعد طلوع الأربع أدوار طالع نازل كام مرة خلصت الطلب من الإدارة ورحت سلمته للمديرية في عابدين. استلموه وقالوا لي تعالى بعد أسبوعين.

فاتوا الأسبوعين، ورحت هناك اسأل، لفيت المديرية من صادر لوارد لشؤون عاملين لانتدابات، في النهاية قالوا لي تعالى بعد كمان أسبوعين.

بعد أسبوعين كمان رحت اسأل قالوا لي الطلب في المحافظة قدامه هناك أسبوعين.

مش عارف إيه حكاية أسبوعين دي. كان زمااااااااان بيقولوها "فوت علينا بكرة ياسيد". صحيح بكرة ده ماكانش بييجي بس كان مريح نفسياً عن "فوت علينا بعد أسبوعين".

قلت أروح المحافظة في عابدين أتابع الورق بنفسي. لقيت على الباب اثنين موظفين أمن مانعين أي شخص من الدخول. قلت لهم عاوز أعرف ورقي اتمضى وللا لسة؟

واحد منهم قام جاي مزحلقني على طول: " المحافظ مفوض صلاحيات التربية والتعليم لنوابه وتقدر تتابع مع نائب المحافظ وهتلاقيه في مجلس الحي اللي انت تابع ليه".
قلت له طيب اتأكد علشان ما اضربش مشوار على الفاضي. قال لي حاضر هاتأكد لك من زميلي

سأل زميله: بررررررررررررررررررم التربية والتعليم؟

زميله رد: أيوة بررررررررررررررررررم التربية والتعليم

قال لي اتأكدت بنفسك أهو قال لك: بررررررررررررررررررم التربية والتعليم

قلت له تصدق أنك أفحمتني بالرد.

مشيت والفحم بيشر من هدومي ومش قادر أمشي من كتر الفحم اللي أفحمهولي. شوية وافتكرت ان معايا رقم الصادر قلت ارجع استفسر برقم الصادر.

قال لي طب اتلطع هنا عالبوابة شوية على ما اسأل باللاسلكي. بعدها بشوية قال لي انا سألت واستنى على ما ييجي الرد. قلت له ما ادخل اقعد على الكرسي اللي جوة ده. بص لي باستنكار وقال لي اقعد في أي حتة ظل عندك. قلت له هو ظل الشجر موجود الحمد لله بس مفيش غير الرصيف اقعد عليه. قال لي ما الناس كلها قاعدة برة أهي في الظل ومستنيين الفرج. قلت له ماشي خليني واقف مستني لكن ليه هو الورق بيتأخر كدة؟ قال لي أصل الورق بييجي للمحافظة في "سركي" وبيتمضي ويخرج من المحافظة في "سركي". قلت في بالي "هااااااار اسود . . سركي دي كلمة ما اتقالتش من أيام المماليك!" ببص لقيت عيني جت على باب المحافظة ولقيت عليه الهلال والثلاث نجوم، دُخت بصيت ورايا لقيت قصر عابدين. أنا حسيت اننا في أربعينيات القرن الماضي. حسست على رأسي علشان أتأكد إذا كنت لابس الطربوش وللا نسيته!

المهم بعد ساعتين وانا ملطوع مستني يردوا على الباشا موظف الأمن باللاسلكي، نده على إسمي وقال لسة ما اتمضتش والأفضل ما تجيش تاني لأنها لما تتمضي مش هاتستلمها لأنها لازم تخرج من المحافظة في "سركي". قلت له يعني ما ينفعش تروح بالإيميل؟ قال لي أعوذ بالله من الشيطان الرجيم. إنت من عبدة الشيطان يا أستاذ وللا إيه؟ قلت له أشهد أن لا إله إلا الله وأن محمداً رسول الله. ربنا يوصل "السركي" بالسلامة.

فات شهرين بالتمام والكمال من ساعة ما قدمت طلب الانتداب لحد ما جات الموافقة عليه. الحمد لله هاقدر أروح أشتغل في بلدنا وأعيش مع أهلي هناك في المنوفية. باقي لي خطوة واحدة وهي إني أسلم الموافقة على الانتداب لمديرية التربية والتعليم بالمنوفية.

أخيراً وصلت لمكتب شؤون العاملين بالمديرية وبدأت أسلمهم الورق. قالوا لي انت ماقريتش اللي مكتوب على الباب؟ قلت لهم خير؟ إيه اللي مكتوب على الباب؟

قالوا لي قرار من وزير التنمية المحلية يمنع الانتداب من أو إلى المنوفية إلى أجل غير مسمى. قلت في بالي "ان شالله ما يتسمى". هي المنوفية بقت جنة الله في أرضه وانا ما اعرفش واللا إيه؟ يعني هاسافر كل يوم من المنوفية للقاهرة؟ إزاي؟ قالوا لي هات موافقة المحافظ أو وزير التنمية المحلية علشان نوافق لك على الانتداب.

بعد مشاورات مع الأهل والأصدقاء والزملاء والخبراء وكل من له صلة بالموضوع، اتفق الجميع بعد اندهاشهم من رفض المنوفية لشخص جاي يشتغل عندهم رغم ان جهة عمله الأصلية موافقة على انتدابه، اتفقوا على أن أتقدم بطلب لوزير التنمية المحلية وللمحافظ أشرح فيه أنني عدت من السفر ولن أقيم في القاهرة وأن محل إقامتي الحالية هي المنوفية.

المهم، بعد كر وفر وزحلقة بين مكاتب السادة المسؤولين (على أساس إن احنا العبيد الملاعين يعني) وصلت إلى النهاية السعيدة اللي بتستناها كل حكومة: أخذت أجازة بدون مرتب وحالياً قاعد جنب أبويا وأمي وفي نهاية السنة هادفع للحكومة التأمينات والمعاشات، وبكدة حكومتنا طلعت واعية وأروبة، قعدتني في بيتي وهتاخد مني فلوس كمان وبرضايا. أ....يييييييييييييييه!

نفسي أفهم ليه حكومتنا بتعبد الورق رغم انه بيكلفها كتير وبيعطل الشغل على بال ما تتمضي الورقة من موظف وتروح لموظف وبعدين تروح تتمضي من جهة تانية في "سركي" ليييييييييييييه؟

أول ما رحت السعودية كان تقريباً عندهم نفس النظام الورقي لدرجة ان انا بعد ما اشتغلت شهرين والراتب ما نزلش، المدير اتصل بالإدارة في الرياض يستفسر عن سبب تأخير المرتب قالوا له ما عندناش ورق باسم الموظف اللي انت بتقول عليه. ابعت لنا ورقه علشان نبعت له المرتب. مش عارف هو سوء حظ وللا غباء من الآخرين، المهم الحمد لله جه المرتب بعد كمان شهرين!

لكن هناك طوروا نفسهم وقبل ما انزل مصر كانت كل المعاملات في الشغل إلكترونية، تدخل باسم المستخدم وكلمة المرور على نظام المؤسسة وتقدم الطلب اللي انت عاوزه وتتابعه على النظام لأن بيظهر لك مخطط تفصيلي لرحلة الطلب المفترضة وتقدر تعرف كل خطوة بتتم وإذا كان متوقف عند أحد الموظفين تقدر تبعت له إيميل وإذا لم يرد تبعت إيميل لمديره وهكذا إلى أن تصل للوزير وأنت جالس في مكتبك وفي أي وقت طوال اليوم.

كمان كنت بادخل على حسابي في البنك السعودي عن طريق الإنترنت وأنا في مصر وأحول لنفسي فلوس أو لأي شخص وأسدد الكهرباء والتليفون وجميع المعاملات الحكومية السعودية وأنا هنا في مصر!
كان نفسي أقول "إشي خيال يا ناس!"  بس هو عندهم حقيقة وللأسف عندنا ما زال خيال!